భారతీయులకు భారీ షాక్… 2028 వరకు అమెరికా గ్రీన్ కార్డ్ లాటరీకి నో ఎంట్రీ!

అమెరికాలో సెటిల్ అవ్వాలి, అక్కడ మంచి జాబ్ చేయాలి, మన పిల్లలకు బంగారు భవిష్యత్తు ఇవ్వాలి... ఇది ఎంతో మంది భారతీయులు కనే కల. డాలర్లు సంపాదించి ఇండియాలో ఉన్న మన కుటుంబాన్ని బాగా చూసుకోవాలనే ఆశ ఎంతో మందిలో ఉంటుంది. ఈ కలను నిజం చేసుకోవడానికి చాలా దారులు ఉన్నాయి. కొందరు చదువుకోవడానికి స్టూడెంట్ వీసా మీద వెళ్తే, మరికొందరు ఉద్యోగం కోసం H-1B లాంటి వర్క్ వీసాలపై వెళ్తారు. అయితే, వీటన్నిటితో సంబంధం లేకుండా, చాలా సులభంగా అమెరికా పౌరసత్వానికి మొదటి మెట్టు అయిన "గ్రీన్ కార్డ్" సంపాదించడానికి ఒకే ఒక సులువైన మార్గం ఉంది. అదే "డైవర్సిటీ వీసా లాటరీ" లేదా మనందరికీ తెలిసిన భాషలో చెప్పాలంటే "గ్రీన్ కార్డ్ లాటరీ". కానీ, ఇప్పుడు ఆ సులువైన దారి మన భారతీయులకు పూర్తిగా మూసుకుపోయింది. ఇది వినడానికి కొంచెం బాధగా ఉన్నా, దీని వెనుక ఉన్న కారణాలు తెలుసుకోవడం మనకు చాలా ముఖ్యం. కనీసం 2028 వరకు, అంటే రాబోయే 2 సంవత్సరాల పాటు, భారతీయులు ఈ గ్రీన్ కార్డ్ లాటరీకి అప్లై చేసుకునే అవకాశం లేదని అమెరికా ప్రభుత్వం తేల్చి చెప్పేసింది. ఈ విషయం గురించి ఈ వీడియోలో పూర్తిగా తెలుసుకుందాం.

ముందుగా మనం ఈ గ్రీన్ కార్డ్ లాటరీ గురించి పూర్తిగా తెలుసుకుందాం. "గ్రీన్ కార్డ్" అంటే అమెరికాలో పర్మనెంట్‌గా నివసించడానికి, పని చేయడానికి ఇచ్చే ఒక పర్మిషన్ కార్డు. ఇది ఉంటే, మీరు అమెరికా పౌరులతో దాదాపు సమానమైన హక్కులను పొందుతారు. అక్కడ ఏ కంపెనీలోనైనా ఉద్యోగం చేయవచ్చు, సొంతంగా బిజినెస్ పెట్టుకోవచ్చు, ఇల్లు కొనుక్కోవచ్చు. కొన్ని సంవత్సరాల తర్వాత అమెరికా పౌరసత్వం కోసం కూడా అప్లై చేసుకోవచ్చు.

సాధారణంగా ఈ గ్రీన్ కార్డ్ పొందాలంటే చాలా పెద్ద ప్రాసెస్ ఉంటుంది. ఉద్యోగం ద్వారా అయితే కంపెనీ స్పాన్సర్ చేయాలి, దానికి ఏళ్ల తరబడి ఎదురుచూడాలి. కొన్నిసార్లు పది, పదిహేనేళ్లు కూడా పడుతుంది. కానీ ఈ "డైవర్సిటీ వీసా లాటరీ" అలా కాదు. ఇది అచ్చం మన లక్కీ డ్రా లాంటిది. దీనికి పెద్దగా చదువు, డబ్బు, లేదా ఉద్యోగ అనుభవం వంటి పెద్ద పెద్ద అర్హతలు అవసరం లేదు. కేవలం కొన్ని బేసిక్ అర్హతలు ఉంటే చాలు, ఎవరైనా ఆన్‌లైన్‌లో ఫ్రీగా అప్లికేషన్ పెట్టుకోవచ్చు. ప్రతి సంవత్సరం అమెరికా ప్రభుత్వం కంప్యూటర్ ద్వారా రాండమ్‌గా కొంతమందిని సెలెక్ట్ చేస్తుంది. అలా లాటరీలో మీ పేరు వస్తే, పెద్ద కష్టం లేకుండానే మీకు గ్రీన్ కార్డ్ వచ్చేస్తుంది. అందుకే చాలా మంది దీనిని "గోల్డెన్ టికెట్" అని పిలుస్తారు మన భారతీయులు.

ఈ ప్రోగ్రామ్‌కు "డైవర్సిటీ వీసా" అని పేరు పెట్టడానికి ఒక కారణం ఉంది. "డైవర్సిటీ" అంటే "వైవిధ్యం". అమెరికాలోకి ప్రపంచంలోని అన్ని దేశాల ప్రజలు రావాలని, కేవలం కొన్ని దేశాల నుంచే ఎక్కువ మంది రాకూడదని వారి ఉద్దేశం. ఒకే దేశం నుంచి వలసలు ఎక్కువగా ఉంటే, అక్కడ సాంస్కృతిక వైవిధ్యం దెబ్బతింటుంది. అందుకే, ఏ దేశాల నుంచి అయితే గత ఐదేళ్లలో వలసలు తక్కువగా ఉన్నాయో, ఆ దేశాల ప్రజలకు మాత్రమే ఈ లాటరీలో అవకాశం కల్పిస్తారు. ఇది ఒక పార్టీకి అందరినీ పిలిచినట్టు. ఒకే ఫ్రెండ్స్ గ్రూప్ నుంచి పది మంది వస్తే, మిగతా వాళ్లకు చోటు ఉండదు కదా! అందుకే, పార్టీ హోస్ట్ "ఈసారి వేరే గ్రూప్ వాళ్లకు అవకాశం ఇద్దాం" అని చెప్పినట్టు, అమెరికా కూడా తక్కువ వలసలు ఉన్న దేశాలకు ఈ లాటరీ అవకాశం ఇస్తుంది.

ఇక్కడే మన భారతదేశానికి అసలు సమస్య మొదలైంది. అమెరికా ప్రభుత్వం పెట్టిన సింపుల్ రూల్ ఏంటంటే, "ఏదైనా ఒక దేశం నుంచి గత ఐదు సంవత్సరాలలో 50,000 మంది కంటే ఎక్కువ మంది చట్టబద్ధంగా అమెరికాకు వలస వచ్చి ఉంటే, ఆ దేశాన్ని ఈ లాటరీ లిస్టులోంచి తీసేస్తాం" అనేది ఆ రూల్.

దురదృష్టవశాత్తు, మన భారతదేశం ఈ లిమిట్‌ను ఎప్పుడో దాటేసింది. మనవాళ్ల ప్రతిభ, కష్టపడి పనిచేసే తత్వం వల్ల, గత కొన్నేళ్లుగా ఇండియా నుంచి అమెరికాకు వెళ్లే వారి సంఖ్య లక్షల్లో ఉంది. ఒక్కసారి మనం ప్రభుత్వం ఇచ్చిన లెక్కలు చూద్దాం.

• 2021వ సంవత్సరంలో, మన దేశం నుంచి సుమారు 93,450 మంది అమెరికాకు వలస వెళ్లారు.

• 2022లో ఈ సంఖ్య ఇంకా పెరిగి, ఏకంగా 1,27,010 మందికి చేరింది.

• 2023లో కొంచెం తగ్గినా, ఆ ఏడాది కూడా 78,070 మంది భారతీయులు అమెరికాలో అడుగుపెట్టారు.

ఈ నంబర్లు చూస్తేనే మనకు అర్థమవుతుంది, 50,000 అనే లిమిట్ కంటే మనం ఎంత ఎక్కువ సంఖ్యలో వెళ్తున్నామో. ఈ భారీ వలసల కారణంగా, అమెరికా ప్రభుత్వానికి ఒక విషయం స్పష్టంగా అర్థమైంది: భారతదేశం నుంచి ఇప్పటికే చాలా మంది అమెరికా వస్తున్నారు, కాబట్టి వారికి ఈ 'డైవర్సిటీ' లాటరీ అవసరం లేదు అని. అందుకే, ఈ లెక్కల ఆధారంగా 2028 వరకు మనల్ని ఈ లాటరీకి అనర్హులుగా, అంటే అర్హత లేనివారిగా ప్రకటించారు.

ఈ నిర్ణయం అమెరికా వెళ్లాలనుకునే ఎంతో మంది భారతీయులపై నేరుగా ప్రభావం చూపుతుంది.

 పెద్దగా ఖర్చు లేకుండా, కష్టపడకుండా అమెరికాలో సెటిల్ అవ్వాలనుకుని ఎదురు చూసే వారికి ఇది పెద్ద నిరాశ. లాటరీ తగిలితే లైఫ్ సెటిల్ అయిపోతుంది అనుకున్న ఎంతో మంది కలలు ఇప్పుడు ఆగిపోయినట్టే.

అలాగే ఇప్పటికే H-1B లాంటి టెంపరరీ వర్క్ వీసాలపై అమెరికాలో పనిచేస్తున్న మన టెక్కీలు చాలా మంది ఉన్నారు. గ్రీన్ కార్డ్ కోసం వాళ్లు ఏళ్ల తరబడి ఎదురుచూస్తున్నారు. ఈ లాటరీ వారికి ఒక 'బ్యాకప్ ప్లాన్' లేదా 'షార్ట్‌కట్' లాంటిది. ఒకవేళ లాటరీ తగిలితే, గ్రీన్ కార్డ్ ప్రాసెస్ త్వరగా అయిపోతుందని ఆశపడేవారు. ఇప్పుడు ఆ ఆశ కూడా లేకుండా పోయింది.

ఇప్పుడు ఈ లాటరీ దారి మూసుకుపోవడంతో, అందరూ చదువు, ఉద్యోగం వంటి ఇతర మార్గాల పైనే ఆధారపడాల్సి వస్తుంది. దీనివల్ల ఆ వీసాలకు పోటీ మరింత పెరిగి, వాటిని పొందడం ఇంకా కష్టంగా మారవచ్చు.

ఇప్పటికే ట్రంప్ ప్రభుత్వం వచ్చాక అమెరికా ఇమ్మిగ్రేషన్ రూల్స్ చాలా స్ట్రిక్ట్ అయ్యాయి. వీసాలు రిజెక్ట్ అవ్వడం, ప్రాసెస్ ఆలస్యం అవ్వడం వంటి సమస్యలతో మనవాళ్లు ఇబ్బంది పడుతున్నారు. ఈ సమయంలో ఈ లాటరీని కూడా ఆపేయడం అనేది వాళ్లకు "గోరుచుట్టుపై రోకటి పోటు" లాంటిదే. ట్రంప్ తీసుకున్న ఈ నిర్ణయం భారతీయులపై తీవ్రమైన ప్రభావం పడనుంది.

అయితే, ఈ విషయంలో మనం ఒంటరి కాదు. మనలాగే, ఏ దేశాల నుంచి అయితే వలసలు ఎక్కువగా ఉన్నాయో, వాటన్నిటినీ ఈ లిస్టు నుంచి తీసేశారు. మన పొరుగు దేశాలైన చైనా, పాకిస్థాన్ ప్రజలకు కూడా ఈ లాటరీలో పాల్గొనే అవకాశం లేదు. అలాగే కెనడా, దక్షిణ కొరియా, వియత్నాం, యునైటెడ్ కింగ్‌డమ్ వంటి దేశాలు కూడా ఈ లిస్టులో ఉన్నాయి.

గ్రీన్ కార్డ్ లాటరీ మూసుకుపోయినంత మాత్రాన అమెరికా వెళ్లే దారులన్నీ మూసుకుపోయినట్టు కాదు. ఇప్పటికీ చాలా మార్గాలు ఉన్నాయి, కానీ ఈ మధ్య కాలంలో అంటే ట్రంప్ అధికారంలోకి వచ్చిన తర్వాత ఇవి కొంచెం కష్టంతో కూడుకున్నవి. స్టూడెంట్ వీసా మీద వెళ్లి, బాగా చదువుకుని, మంచి ఉద్యోగం సంపాదించి, ఆ తర్వాత కంపెనీ ద్వారా గ్రీన్ కార్డ్ కోసం అప్లై చేసుకోవడం ఒక మార్గం. లేదా ఇండియా నుంచే నేరుగా ఉద్యోగానికి అప్లై చేసి వర్క్ వీసా మీద వెళ్లడం మరో మార్గం.

భవిష్యత్తులో మనకు మళ్ళీ అవకాశం వస్తుందా అంటే, ఖచ్చితంగా చెప్పలేం. ఇమ్మిగ్రేషన్ రూల్స్ అనేవి శాశ్వతం కాదు, అవి ఎప్పటికప్పుడు మారుతూ ఉంటాయి. ఒకవేళ భవిష్యత్తులో ఇండియా నుంచి అమెరికాకు వెళ్లే వారి సంఖ్య గణనీయంగా తగ్గి, 50,000 లిమిట్ కంటే కిందకు వస్తే, అప్పుడు మన దేశాన్ని మళ్ళీ ఈ లాటరీ లిస్టులో చేర్చే అవకాశం ఉంటుంది.అలాగే ట్రంప్ బదలు భవిష్యత్తులో వేరే పార్టీ అధికారంలోకి వస్తే… వెంటనే ఇమిగ్రేషన్ రూల్స్ మారే అవకాశం ఉంది.  కానీ ప్రస్తుతానికి, రాబోయే నాలుగైదేళ్ల వరకు మాత్రం ఈ గ్రీన్ కార్డు లాటరీ మీద ఆశలు పెట్టుకోకపోవడమే మంచిది.

అమెరికా వెళ్లాలనుకునే భారతీయులు ఇప్పుడు మరింత వాస్తవికంగా ఆలోచించాలి. లాటరీ లాంటి అదృష్టం మీద ఆధారపడకుండా, తమ చదువు, నైపుణ్యాలు, కష్టపడే తత్వం మీద ఆధారపడి సరైన మార్గాన్ని ఎంచుకోవాలి. అదృష్టం తలుపు తట్టకపోయినా, మన ప్రతిభే మనకు దారి చూపుతుంది.