సొంత కారు వద్దు - అద్దె కారే ముద్దు… డౌన్ పేమెంట్, ఈఎంఐ లేకుండా కారు మీదే..యూత్ ఫాలో అవుతున్న కొత్త రూట్ ఇదే

ఈ రోజుల్లో యువత ఆలోచనా విధానం పూర్తిగా మారిపోయింది. ఒకప్పుడు మన నాన్నల కాలంలో లేదా మన తాతల కాలంలో ఏదైనా వస్తువు మనకు కావాలి అంటే అది కచ్చితంగా మన సొంతం అయి ఉండాలి అని గట్టిగా కోరుకునేవారు. మన పేరు మీద ఇల్లు ఉండాలి, మన పేరు మీద బైక్ ఉండాలి, కారు ఉండాలి అని ఆశపడేవారు. దానికోసం ఎంత కష్టపడటానికైనా సిద్ధంగా ఉండేవారు. కానీ ఇప్పుడు పరిస్థితి అలా లేదు. ఇప్పుడు వస్తున్న జనరేషన్ జెడ్ అంటే జెన్ జీ,  ఈ తరం కుర్రాళ్లు, యువత మాత్రం చాలా ప్రాక్టికల్ గా ఆలోచిస్తున్నారు. ఏదైనా సరే మనకు పని జరగాలి, మనం కంఫర్ట్ గా ఉండాలి కానీ, అది మన సొంతం అవ్వాల్సిన అవసరం లేదు అని ఫిక్స్ అయిపోతున్నారు. ఈ మార్పు అనేది ముఖ్యంగా కార్ల విషయంలో చాలా స్పష్టంగా కనిపిస్తోంది. లక్షలకు లక్షలు పోసి కారు కొనడం కంటే, సింపుల్ గా నెలనెలా రెంట్ కట్టి వాడుకోవడం బెటర్ అని అనుకుంటున్నారు. అసలు ఈ ట్రెండ్ ఎందుకు వచ్చింది? దీని వెనుక ఉన్న అసలు కథ ఏంటి? అనేది మనం ఇప్పుడు వివరంగా తెలుసుకుందాం.

ఎప్పటి నుంచో ఈ కార్ల లీజింగ్ అనేది ఉంది. అయితే వ్యక్తులు కాకుండా అప్పుట్లో సంస్థలు అంటే కంపెనీలు వాహనాలను లీజ్ కు తీసుకునేవి.

అప్పట్లో ఈ లీజు విషయం చూసినప్పుడు చాలామందికి ఆశ్చర్యం కలిగేది. ఒక సాధారణ వ్యక్తికి వచ్చే సందేహం ఏంటంటే... అసలు కంపెనీ వాళ్ళు ఆ కార్లు డైరెక్ట్ గా కొనేసుకోవచ్చు కదా? ప్రతీ నెలా ఆ ట్రావెల్స్ వాళ్లకు అంతంత డబ్బులు అద్దె రూపంలో ఎందుకు వేస్ట్ చేస్తున్నారు? సొంతంగా కొంటే ఆస్తి మిగులుతుంది కదా అని అనిపించేది.ఇక్కడే ఒక లాజిక్ ఉంది, మనం కారు కొంటే, దానికి డ్రైవర్ ని పెట్టాలి, వాడికి జీతం ఇవ్వాలి, కారుని రోజూ క్లీనింగ్ చేయించాలి, కారుకి చిన్న రిపేర్ వచ్చినా వర్క్ షాప్ చుట్టూ తిరగాలి, ప్రతి ఏటా ఇన్సూరెన్స్ కట్టాలి, టైర్లు మార్పించాలి. ఇదంతా కంపెనీకి చాలా పెద్ద తలనొప్పి. ఈ పనులన్నీ చూసుకోవడానికి మళ్ళీ ఒక మనిషిని పెట్టాలి.

అదే మనం లీజుకు తీసుకున్నాం అనుకోండి, అంటే అద్దె పద్ధతిలో తీసుకుంటే మనకు ఈ బాధలు ఏమీ ఉండవు. బండి మెయింటెనెన్స్, డ్రైవర్ జీతం, రిపేర్లు, ఇన్సూరెన్స్ అన్నీ ఆ ఏజెన్సీ వాళ్ళే చూసుకుంటారు. ఒకవేళ కారు చెడిపోతే వెంటనే వేరే కారు పంపిస్తారు. మనకు కావాల్సినప్పుడు కారు రెడీగా ఉంటుంది, మన పని జరిగిపోతుంది, ఎలాంటి టెన్షన్ ఉండదు. పైగా లీజుకు తీసుకున్నప్పుడు మనకు పన్ను మినహాయింపులు కూడా వస్తాయి అని వాళ్ళు వివరించారు. అంటే కార్పొరేట్ కంపెనీలు అప్పట్లోనే ఓనర్ షిప్ అంటే యాజమాన్యం కంటే కంఫర్ట్ ముఖ్యం అని, పనుల్లో ఆటంకం ఉండకూడదని ఆలోచించేవి.

సరిగ్గా ఇప్పుడు మన యువత కూడా అదే కార్పొరేట్ స్టైల్ లో ఆలోచిస్తున్నారు. ఒక మధ్య తరగతి కుర్రాడు ఒక మంచి కారు కొనాలంటే ఇప్పుడున్న రేట్ల ప్రకారం చాలా కష్టం. ఉదాహరణకు ఒక మోస్తరు ఎస్ యూ వీ కారు కొనాలంటే షోరూమ్ లో దాని ధర 13 లక్షల రూపాయలు ఉంటుంది. కానీ అది రోడ్డు మీదకు వచ్చేసరికి ట్యాక్సులు, ఇన్సూరెన్స్, ఇతర ఖర్చులు అన్నీ కలిపి 18 నుండి 19 లక్షల వరకు అవుతుంది. అంత డబ్బు పెట్టాలంటే సామాన్యమైన విషయం కాదు. మొదట చేతిలో నుండి ఒక 3 లేదా 4 లక్షలు డౌన్ పేమెంట్ కట్టాలి. ఆ తర్వాత ప్రతీ నెలా ఈఎంఐ కట్టాలి. దానికి తోడు పెట్రోల్ ఖర్చు ఎలాగూ ఉంటుంది. ఇవన్నీ కాకుండా ప్రతీ ఏటా ఇన్సూరెన్స్ రెన్యూవల్ చేయించాలి, కార్ సర్వీసింగ్ చేయించాలి.

ఒకవేళ మనం కష్టపడి కారు కొన్నా సరే, రోడ్డు మీద వెళ్తున్నప్పుడు చిన్న గీత పడినా, ఎవరైనా గుద్దినా మన గుండె విలవిలలాడిపోతుంది. అయ్యో నా కొత్త కారు పాడైపోయింది అని చాలా బాధపడతాం. దాన్ని రిపేర్ చేయించడానికి మళ్ళీ జేబులో డబ్బులు ఖర్చు పెట్టాలి లేదా ఇన్సూరెన్స్ ఆఫీస్ చుట్టూ తిరగాలి. ఈ తతంగం అంతా చూసిన తర్వాత, ఈ కొత్త తరం వాళ్ళు ఇంత రిస్క్ మనకు ఎందుకు? ఇంత టెన్షన్ పడే బదులు వేరే దారి లేదా అని ఆలోచిస్తున్నారు.

దీనికి ప్రత్యామ్నాయంగా వచ్చిందే ఈ కార్ లీజింగ్ విధానం. దీన్నే సబ్ స్క్రిప్షన్ మోడల్ అని కూడా అంటున్నారు. ఇందులో మనం కారు కొనాల్సిన అవసరం లేదు. ఒక్క రూపాయి కూడా డౌన్ పేమెంట్ కట్టాల్సిన పని లేదు. జస్ట్ మనకు నచ్చిన కారుని ఎంచుకుని, నెలకు ఇంత అని రెంట్ లాంటిది కడితే చాలు. ఆ కారు మన ఇంటి ముందే ఉంటుంది, మనం సొంత కారులాగే వాడుకోవచ్చు. నెంబర్ ప్లేట్ కూడా ప్రైవేట్ కారులాగే ఉంటుంది. ఎల్లో ప్లేట్ ఉండదు. కాబట్టి ఎవరికీ అది అద్దె కారు అని కూడా తెలియదు.

అంతేకాకుండా, ఒకవేళ కారుకి ఏదైనా రిపేర్ వచ్చినా, టైర్లు అరిగిపోయినా, బ్యాటరీ పోయినా, ఇన్సూరెన్స్ క్లెయిమ్ చేయాల్సి వచ్చినా ఆ కంపెనీ వాళ్ళే చూసుకుంటారు. సర్వీసింగ్ టైమ్ వచ్చినప్పుడు వాళ్ళే వచ్చి కారు తీసుకువెళ్లి, సర్వీస్ చేయించి మళ్ళీ తెచ్చి ఇస్తారు. మనం జస్ట్ పెట్రోల్ పోయించుకుని వాడుకోవడమే. దీనివల్ల ఒకేసారి లక్షల రూపాయలు కారు మీద పెట్టాల్సిన అవసరం ఉండదు. ఆ డబ్బుతో వేరే ఏదైనా బిజినెస్ చేసుకోవచ్చు లేదా ఇన్వెస్ట్ చేసుకోవచ్చు.

మరో ముఖ్యమైన విషయం ఏంటంటే, ఈ రోజుల్లో కుర్రాళ్ళ టేస్ట్ చాలా త్వరగా మారిపోతోంది. ఫోన్ల లాగే కార్లు కూడా కొత్త కొత్త మోడల్స్ వస్తున్నాయి. ఒక కారు కొంటే దాన్ని పదేళ్లు వాడటం వాళ్లకు నచ్చట్లేదు. రెండు, మూడేళ్లు వాడాక ఆ కారు బోర్ కొట్టేస్తుంది. అదే సొంత కారు అయితే, దాన్ని అమ్మాలంటే ధర తగ్గిపోతుంది, సరైన రేటు రాదు, అదొక పెద్ద పని. కానీ ఈ లీజింగ్ పద్ధతిలో అయితే, ఒక రెండేళ్లు వాడేసి, ఆ కారు వాళ్ళకి తిరిగి ఇచ్చేసి, మళ్ళీ మార్కెట్ లోకి వచ్చిన కొత్త మోడల్ కారుని తెచ్చుకోవచ్చు. అంటే ఎప్పుడూ కొత్త కారులోనే తిరిగే అవకాశం ఉంటుంది. ఈ ఫ్లెక్సిబిలిటీ వల్లే హైదరాబాద్ లాంటి మెట్రో సిటీల్లో ఈ ట్రెండ్ బాగా పెరుగుతోంది.

ప్రస్తుతం మార్కెట్ లో ఈ సర్వీసులు ఇవ్వడానికి చాలా కంపెనీలు ఉన్నాయి. ఉదాహరణకు ఒరిక్స్, మైల్స్, రెవ్ లాంటి సంస్థలు దీనికోసం స్పెషల్ ప్లాన్స్ ఆఫర్ చేస్తున్నాయి.

ఒరిక్స్ అనే కంపెనీ గురించి చూస్తే, వీళ్ళు పెద్ద పెద్ద కార్పొరేట్ లీజింగ్ సర్వీసులు ఇస్తుంటారు. ఇందులో మనం ఒక సంవత్సరం నుండి ఐదు సంవత్సరాల వరకు అగ్రిమెంట్ చేసుకోవచ్చు. మధ్యలో క్యాన్సిల్ చేసుకోవాలంటే కొంచెం ఫీజు కట్టాల్సి ఉంటుంది.

మైల్స్ అనే కంపెనీలో అయితే కేవలం మూడు నెలల నుంచే ప్లాన్స్ మొదలవుతాయి. వీళ్ళు కొత్త కార్లే కాకుండా, మంచి కండిషన్ లో ఉన్న సెకండ్ హ్యాండ్ కార్లను కూడా లీజుకు ఇస్తారు. పాత కారు అయితే రెంట్ ఇంకా తక్కువ పడుతుంది. దీర్ఘకాలం పాటు కారు అవసరం లేదు అనుకునేవారికి ఇది బెస్ట్ ఆప్షన్.

ఇక రెవ్ అనే కంపెనీ అయితే ఒక అడుగు ముందుకేసి నెల రోజుల సబ్ స్క్రిప్షన్ కూడా ఇస్తోంది. అంటే మనం నెట్‌ఫ్లిక్స్ లేదా అమెజాన్ ప్రైమ్ రీచార్జ్ చేసుకున్నట్లు, ఒక నెల కారు వాడుకుని నచ్చకపోతే మానేయొచ్చు అన్నమాట. అలాగే హ్యుందాయ్ లాంటి కార్ల కంపెనీలు కూడా డైరెక్ట్ గా తమ కార్లను లీజుకు ఇస్తున్నాయి.

మొత్తంగా చూస్తే, ఒక కారుని సొంతం చేసుకుని, దాని ఈఎంఐలు కడుతూ, సర్వీసింగ్ సెంటర్ల చుట్టూ తిరుగుతూ టెన్షన్ పడటం కంటే, నెలవారీ చందా కట్టేసి రాచరికంగా వాడుకోవడం బెటర్ అని ఈ జనరేషన్ డిసైడ్ అయిపోయింది. కారు మనదా కాదా అన్నది ముఖ్యం కాదు, మన జర్నీ స్మూత్ గా సాగిందా లేదా అన్నదే పాయింట్. భవిష్యత్తులో కారు కొనడం అనేది తగ్గిపోయి, ఇలా లీజుకు తీసుకోవడమే కామన్ అయిపోయే రోజులు దగ్గర్లోనే ఉన్నాయి. ఇది వినడానికి కొత్తగా ఉన్నా, ప్రాక్టికల్ గా ఆలోచిస్తే చాలా లాభదాయకంగా కనిపిస్తోంది. అందుకే సిటీల్లో ఈ సంస్కృతి వేగంగా పెరుగుతోంది.