అమెరికాలో భారతీయ స్టూడెంట్స్‌కి బిగ్ షాక్… ఆ ఒక్క రూల్ మారితే... అన్నీ సర్దుకుని వెనక్కి రావాల్సిందే

మన ఇండియాలో, ముఖ్యంగా మన తెలుగు రాష్ట్రాల్లో దాదాపు ప్రతి ఇంజనీరింగ్ స్టూడెంట్ కనే అతి పెద్ద కల 'అమెరికా'. ఎలాగైనా సరే USA వెళ్ళాలి, అక్కడ MS చదవాలి, పెద్ద సాఫ్ట్‌వేర్ కంపెనీలో జాబ్ సంపాదించాలి, డాలర్లలో జీతం తెచ్చుకోవాలి, లైఫ్‌లో బాగా సెటిల్ అవ్వాలి. ఇది కేవలం ఒక స్టూడెంట్ కల మాత్రమే కాదు, ఆ స్టూడెంట్ వెనుక ఉన్న తల్లిదండ్రుల ఆశ, ఆశయం కూడా. తమ పిల్లల ఫ్యూచర్ కోసం ఇల్లు, పొలం కూడా తాకట్టు పెట్టి, బ్యాంకుల నుండి లక్షలకు లక్షలు, ఒక్కోసారి కోట్లలో కూడా ఎడ్యుకేషన్ లోన్ తీసుకుని మరీ వాళ్లను అమెరికా పంపిస్తారు.

అలా వేల మైళ్ళు దాటి, కొత్త దేశంలో అడుగుపెట్టి, ఎన్నో కష్టాలు పడి, చదువు పూర్తి చేసుకుంటున్న మన భారతీయ విద్యార్థులకు ఇప్పుడు అమెరికా ప్రభుత్వం ఒక పెద్ద షాక్ ఇవ్వడానికి రెడీ అవుతున్నట్లు తెలుస్తోంది. అమెరికా కొత్తగా తీసుకురావాలని చూస్తున్న ఒక రూల్, మన స్టూడెంట్స్ కన్న కలలన్నింటినీ కల్లలు చేసేలా ఉంది. వాళ్ల భవిష్యత్తు మీద, వాళ్ల కెరీర్ మీద ఒక పెద్ద క్వశ్చన్ మార్క్ పెట్టేలా ఉంది. ఇంతకీ అమెరికా ప్లాన్ ఏంటి? మనవాళ్లపై దాని ఎఫెక్ట్ ఎలా ఉండబోతోంది? అనేది ఇప్పుడు చూద్దాం.

ముందుగా మనం ఒక బేసిక్ విషయం తెలుసుకోవాలి. ఇండియా నుండి స్టూడెంట్స్ F1 వీసా మీద అమెరికా వెళ్తారు. ఇది ఒక స్టూడెంట్ వీసా. అంటే, మీరు అక్కడ చదువుకోవడానికి మాత్రమే పర్మిషన్ ఉంటుంది. వాళ్ల కోర్సు, అంటే MS లాంటివి పూర్తయిన తర్వాత, ఈ F1 వీసా మీద వాళ్ళు అక్కడ చట్టబద్ధంగా అంటే లీగల్‌గా పని చేయడానికి వీల్లేదు. వాళ్ళు జాబ్ చేయాలంటే, వాళ్లకు H-1B వీసా కావాలి. H-1B అనేది ఒక లాంగ్ టర్మ్ వర్క్ వీసా. ఇది వస్తేనే వాళ్ళు అక్కడ కంపెనీలలో పర్మినెంట్‌గా జాబ్ చేస్తూ ఉండగలరు.

కానీ, చదువు పూర్తికాగానే H-1B వీసా రావడం అంత ఈజీ కాదు. దానికి ఒక లాటరీ సిస్టమ్ ఉంటుంది. ప్రతి సంవత్సరం అమెరికా ప్రభుత్వం కొన్ని H-1B వీసాలను మాత్రమే ఇస్తుంది, కానీ అప్లై చేసే వాళ్ళు లక్షల్లో ఉంటారు. అప్పుడు లాటరీ తీస్తారు. ఆ లాటరీలో మన పేరు వస్తేనే మనకు ఆ వీసా వస్తుంది.

ఇక్కడే అసలు పాయింట్ ఉంది. చదువు పూర్తయిన వెంటనే H-1B లాటరీలో గెలవడం కష్టం. మరి అప్పటిదాకా అమెరికాలో ఎలా ఉండాలి? ఏదైనా కంపెనీలో పని చేయకుండా, వాళ్లకు మన టాలెంట్ చూపించకుండా ఏ కంపెనీ మనకు H-1B వీసా స్పాన్సర్ చేస్తుంది? అంటే, స్టూడెంట్ వీసాకి (F1) మరియు వర్క్ వీసాకి (H-1B) మధ్య ఒక గ్యాప్ ఉంది. ఆ గ్యాప్‌ను ఫిల్ చేయడానికే అమెరికా ప్రభుత్వం ఇన్నాళ్లూ ఒక స్పెషల్ ప్రోగ్రామ్‌ను రన్ చేస్తోంది. దాని పేరే OPT.

OPT అంటే ఆప్షనల్ ప్రాక్టికల్ ట్రైనింగ్. పేరులోనే ఉంది, ఇది ఒక ట్రైనింగ్ పీరియడ్. అమెరికాలో ఎవరైనా ఫారిన్ స్టూడెంట్ తమ చదువు (డిగ్రీ లేదా పీజీ) పూర్తి చేసిన తర్వాత, వాళ్ళు చదువుకున్న సబ్జెక్టుకు రిలేటెడ్‌గా ఉన్న కంపెనీలలో చట్టబద్ధంగా పని చేయడానికి ఈ OPT ప్రోగ్రామ్ పర్మిషన్ ఇస్తుంది. ఇది ఒక రకంగా మన స్టూడెంట్స్‌కి దొరికిన ఒక గోల్డెన్ పీరియడ్.

ముఖ్యంగా STEM కోర్సులు చదివిన వాళ్లకు, అంటే సైన్స్, టెక్నాలజీ, ఇంజనీరింగ్ మరియు మ్యాథ్స్ సబ్జెక్టులలో MS చేసిన వాళ్లకు, ఈ OPT కింద మొత్తం 3 సంవత్సరాల వరకు అమెరికాలో ఉండి, పని చేసే అవకాశం ఉంటుంది. అంటే, మొదట ఒక సంవత్సరం OPT వస్తుంది, ఆ తర్వాత STEM ఎక్స్‌టెన్షన్ కింద మరో రెండేళ్లు పొడిగిస్తారు. మొత్తం మూడు సంవత్సరాలు.

ఈ మూడు సంవత్సరాల టైమ్ వాళ్లకు చాలా ముఖ్యం. ఎందుకంటే, వాళ్ళు ఈ టైమ్‌లో ఏదైనా ఒక మంచి కంపెనీలో జాబ్ సంపాదించి, తమ పనితనం చూపించి, కంపెనీకి నమ్మకం కలిగిస్తారు. అదే సమయంలో, ప్రతి సంవత్సరం జరిగే H-1B లాటరీకి అప్లై చేసుకుంటారు. మూడు సంవత్సరాల టైమ్ ఉంది కాబట్టి, వాళ్లకు H-1B లాటరీలో పేరు రావడానికి మూడు ఛాన్సులు దొరుకుతాయి. ఈ మూడు సార్లలో ఎప్పుడో ఒకసారి లాటరీ తగిలితే, వాళ్ళ OPT స్టేటస్ కాస్తా H-1B వర్క్ వీసాగా మారుతుంది. అప్పుడు వాళ్ళ జాబ్ సేఫ్, లైఫ్ సెటిల్. ఇన్నాళ్లుగా మన ఇండియన్ స్టూడెంట్స్, ముఖ్యంగా సాఫ్ట్‌వేర్ వైపు వెళ్లేవాళ్లు ఫాలో అవుతున్న రూట్ ఇదే.

తాజా సమాచారం ప్రకారం, ట్రంప్ అడ్మినిస్ట్రేషన్ ఈ OPT ప్రోగ్రామ్ మీద చాలా సీరియస్‌గా ఉంది. ఈ మొత్తం సిస్టమ్‌నే మార్చేయాలని చూస్తోంది. వాళ్ల దగ్గర ఇప్పుడు రెండు ఆలోచనలు ఉన్నట్టు తెలుస్తోంది.

మొదటిది, ఈ OPT ప్రోగ్రామ్‌ను పూర్తిగా క్యాన్సిల్ చేయడం. అంటే, చదువు పూర్తికాగానే స్టూడెంట్స్ వెంటనే వాళ్ల సొంత దేశాలకు తిరిగి వెళ్లిపోవాలి. ఇక ట్రైనింగ్ పీరియడ్, వర్క్ చేసే ఛాన్స్ లాంటివి ఏవీ ఉండవు.

రెండోది, ఒకవేళ పూర్తిగా క్యాన్సిల్ చేయడం కుదరకపోతే, ప్రస్తుతం STEM స్టూడెంట్స్‌కి ఇస్తున్న మూడు సంవత్సరాల టైమ్‌ను కేవలం ఆరు నెలలకు 6 మంత్స్ తగ్గించడం.

ఈ రెండింటిలో ఏది జరిగినా, అది మన భారతీయ విద్యార్థుల మీద చాలా పెద్ద దెబ్బ అవుతుంది. వాళ్ల కెరీర్‌ను నాశనం చేసినట్లే అవుతుంది.

అమెరికా ప్రభుత్వం ఎప్పుడూ చెప్పేది ఒకటే మాట. మాకు నిజమైన టాలెంట్ ఉన్నవాళ్లు కావాలి. మంచి ఎక్స్‌పర్ట్స్, నిపుణులు అమెరికాకు వస్తే మాకు ఏ ప్రాబ్లం లేదు. అలాంటి వాళ్లకు H-1B వీసాలు ఇవ్వడానికి మేము ఎప్పుడూ రెడీ. కానీ, కొంతమంది స్టూడెంట్స్ చదువు పేరుతో అమెరికాకు వచ్చి, తప్పుడు మార్గాల్లో, రూల్స్‌ను వాడుకుని ఇక్కడే సెటిల్ అవ్వాలని చూస్తున్నారు. అలాంటి వాళ్లనే మేము ఆపాలనుకుంటున్నాం అని వాళ్ళు చెబుతున్నారు.

అంతేకాకుండా, అమెరికాలోని కొన్ని సంస్థలు, అక్కడి లోకల్ సిటిజన్స్ నుండి కూడా ప్రభుత్వంపై ఒత్తిడి ఉంది. వాళ్ళ వాదన ఏంటంటే, ఈ OPT ప్రోగ్రామ్ వల్ల ఫారిన్ స్టూడెంట్స్ తక్కువ జీతాలకే పని చేయడానికి ఒప్పుకుంటున్నారు. దీనివల్ల కంపెనీలు అమెరికన్లకు, అంటే అక్కడి లోకల్ పీపుల్‌కు ఉద్యోగాలు ఇవ్వకుండా, ఈ ఫారిన్ స్టూడెంట్స్‌తో పని కానిచ్చేస్తున్నాయి. ఇది ఒక రకంగా ఈ ప్రోగ్రామ్‌ను మిస్‌యూజ్ చేయడమే అని, దీనివల్ల తమకు జాబ్స్ రావడం లేదని అక్కడి వాళ్లు కంప్లైంట్ చేస్తున్నారు. ఈ ఒత్తిడి కారణంగానే, "అమెరికా ఫస్ట్" పాలసీలో భాగంగా, ప్రభుత్వం ఈ OPT ప్రోగ్రామ్‌ను ఆపేయాలని లేదా టైమ్ తగ్గించాలని చూస్తోంది.

ఒకవేళ OPT ని పూర్తిగా క్యాన్సిల్ చేస్తే, ఇక అమెరికాకు MS చదవడానికి వెళ్లే వాళ్ల సంఖ్య చాలావరకు తగ్గిపోతుంది. ఎందుకంటే, కోట్లు ఖర్చు పెట్టి చదివిన తర్వాత, అక్కడ జాబ్ చేసే అవకాశం లేనప్పుడు, అంత రిస్క్ ఎవరూ తీసుకోరు. చదువు పూర్తికాగానే లగేజ్ సర్దుకుని వెనక్కి వచ్చేయాల్సిందే.

మొదటి ఆప్షన్ కాకుండా, రెండో ఆప్షన్ అమలు చేసినా, అంటే OPT టైమ్‌ను మూడు సంవత్సరాల నుండి ఆరు నెలలకు తగ్గిస్తే, అప్పుడు కూడా పరిస్థితి చాలా దారుణంగా ఉంటుంది. ఎందుకంటే, ఆరు నెలల టైమ్‌లో ఒక స్టూడెంట్ జాబ్ వెతుక్కోవడం, కంపెనీకి తన టాలెంట్ ప్రూవ్ చేయడం, H-1B వీసా ప్రాసెస్ స్టార్ట్ చేయడం అనేది అస్సలు సాధ్యం కాదు. H-1B లాటరీ ప్రాసెస్ జరగడానికే చాలా టైమ్ పడుతుంది. ఈ ఆరు నెలల టైమ్ దేనికీ సరిపోదు.

దీనివల్ల, ఎంతో కష్టపడి చదివిన చదువు, తల్లిదండ్రులు చేసిన అప్పులు, వాళ్ల ఆశలు అన్నీ గంగలో కలిసిపోతాయి. ఎంతో మంది స్టూడెంట్స్ ఫ్యూచర్ ఏం చేయాలో తెలియని డైలమాలో పడిపోతుంది. ఇప్పటికే అక్కడ ఉన్న స్టూడెంట్స్, కొత్తగా అడ్మిషన్లు పొంది వెళ్లడానికి రెడీ అవుతున్న స్టూడెంట్స్ అందరిలోనూ ఇప్పుడు ఇదే టెన్షన్ మొదలైంది. ఇది ఖచ్చితంగా మన ఇండియన్ స్టూడెంట్ కమ్యూనిటీకి, ముఖ్యంగా అమెరికాలో సెటిల్ అవ్వాలనుకుంటున్న వాళ్లకు ఒక పెద్ద షాకింగ్ న్యూస్. ఏం జరుగుతుందో చూడాలి.