తెలుగు రాష్ట్రాల్లో భారీగా రేర్ ఎర్త్ ఎలిమెంట్స్…ప్రపంచాన్ని నడిపే శక్తి ఇప్పుడు మన తెలుగు గడ్డపైనే

ఈ రోజుల్లో మన చుట్టూ ప్రపంచం చాలా వేగంగా మారిపోతోంది. ఈ మార్పుకు ముఖ్యంగా రెండు విషయాలు కారణం. ఒకటి, అన్నీ Digital అయిపోవడం. అంటే, మనం డబ్బులు పంపాలన్నా, టికెట్లు బుక్ చేయాలన్నా, చదువుకోవాలన్నా... ప్రతీదీ ఫోన్, కంప్యూటర్, ఇంటర్నెట్‌తోనే జరిగిపోతోంది. దీన్నే డిజిటలైజేషన్ అంటారు. ఇక రెండోది Green Energy. అంటే, పెట్రోల్, డీజిల్ వాడటం వల్ల గాలి పాడైపోతోంది కదా, అలా కాకుండా సూర్యుడి నుంచి, గాలి నుంచి వచ్చే కరెంట్‌ను వాడటం. ఇప్పుడు అందరూ ఎలక్ట్రిక్ కార్లు, ఎలక్ట్రిక్ బస్సులు వాడాలని చూస్తున్నారు.

ఈ రెండు పెద్ద మార్పులు జరగాలంటే, అంటే మన ఫోన్లు, కంప్యూటర్లు పనిచేయాలన్నా, ఎలక్ట్రిక్ బండ్లు నడవాలన్నా... కొన్ని చాలా స్పెషల్ వస్తువులు కావాలి. వాటినే రేర్ ఎర్త్ మెటల్స్ అంటారు. తెలుగులో వీటిని 'అరుదైన లోహాలు' అని పిలుస్తారు. ఇవి చూడటానికి మామూలు మట్టిలా, రాళ్లలా ఉన్నా, వీటి శక్తి చాలా గొప్పది.

ఒకప్పుడు, అంటే మన తాతల కాలంలో, ఏ దేశం దగ్గర ఎక్కువ పెట్రోల్, డీజిల్, గ్యాస్ ఉంటే ఆ దేశమే చాలా గొప్ప. వాళ్లే ప్రపంచాన్ని కంట్రోల్ చేసేవాళ్లు. కానీ ఇప్పుడు రోజులు మారాయి. ఈ కొత్త యుగంలో, ఏ దేశం దగ్గర ఈ రేర్ ఎర్త్ మెటల్స్ ఎక్కువగా ఉంటాయో, ఆ దేశమే నంబర్ వన్ అవుతుంది. ఆ దేశమే ప్రపంచాన్ని నడిపిస్తుంది.

ఈ విషయంలో మన భారతదేశానికి, ముఖ్యంగా మన తెలుగు రాష్ట్రాలకు అంటే ఆంధ్రప్రదేశ్ మరియు తెలంగాణకు ఒక బంపర్ ఆఫర్ తగిలింది. మన కాళ్ల కింద, మన నేలలో, ఈ అత్యంత విలువైన రేర్ ఎర్త్ మెటల్స్ లక్షల టన్నుల్లో దాగి ఉన్నాయని మన సైంటిస్టులు కనుగొన్నారు. ఇది మనకు దొరికిన ఒక పెద్ద నిధి, ఒక ట్రెజర్ లాంటిది. ఇప్పుడు మనం చేయాల్సింది ఒక్కటే... ఈ నిధిని జాగ్రత్తగా బయటకు తీసి, తెలివిగా వాడుకోవడమే. ఇలా చేస్తే మన దేశం, మన రాష్ట్రాలు ఎక్కడికో వెళ్లిపోతాయి.

ఈ రేర్ ఎర్త్ మెటల్స్ ఎందుకు ఇంత కాస్ట్లీ? వీటికి ఎందుకు ఇంత డిమాండ్? అని మనం ఆలోచించాలి. సింపుల్‌గా చెప్పాలంటే, ఇవి లేకపోతే ఈ రోజు మనం వాడుతున్న 90 శాతం టెక్నాలజీ వస్తువులు పనిచేయవు.

• మనం వాడే సెల్‌ఫోన్లు: మన స్మార్ట్‌ఫోన్ స్క్రీన్ ఇంత కలర్‌ఫుల్‌గా, బ్రైట్‌గా వెలగాలన్నా, ఫోన్ వైబ్రేట్ అవ్వాలన్నా అందులో ఈ లోహాలు వాడతారు.

• ఫాస్ట్ ఇంటర్నెట్: మనం ఇప్పుడు 5G అంటున్నాం, రేపు 6G అంటున్నాం. ఈ ఇంటర్నెట్ స్పీడ్ పెరగాలంటే, ఆ సిగ్నల్స్‌ను పంపించే పరికరాల్లో ఇవి కచ్చితంగా ఉండాలి.

• దేశ రక్షణ : ఇది చాలా ముఖ్యం. మన సైనికులు వాడే నైట్ విజన్ కళ్లజోడు (చీకట్లో చూసేవి), శత్రువులకు కనిపించకుండా వెళ్లే స్పెషల్ ఫైటర్ జెట్ విమానాలు, సముద్రం లోపల ఉండే సబ్‌మెరైన్లు, కరెక్ట్‌గా టార్గెట్‌ను కొట్టే మిస్సైల్స్ (క్షిపణులు)... ఇవన్నీ తయారు చేయాలంటే ఈ రేర్ ఎర్త్ మెటల్స్ కావాలి.

• హాస్పిటల్స్: మనం హాస్పిటల్‌కు వెళ్తే MRI స్కాన్ తీస్తారు. ఆ పెద్ద మెషీన్ మొత్తం పనిచేసేదే ఒక పెద్ద అయస్కాంతం (Magnet) మీద. ఆ మాగ్నెట్‌ను ఈ లోహాలతోనే తయారు చేస్తారు.

• ఎలక్ట్రిక్ వాహనాలు: ఇప్పుడు అందరూ ఎలక్ట్రిక్ కార్లు, బైక్‌లు కొంటున్నారు కదా. ఆ బండి నడవాలంటే లోపల ఒక పవర్‌ఫుల్ మోటార్ ఉండాలి. ఆ మోటార్‌ను చాలా శక్తివంతమైన మాగ్నెట్లు తిప్పుతాయి. ఆ మాగ్నెట్లను 'నియోడైమియం' అనే ఒక స్పెషల్ రేర్ ఎర్త్ మెటల్‌తో చేస్తారు.

ఇలా చెప్పుకుంటూ పోతే, కంప్యూటర్ హార్డ్ డిస్క్‌ల నుండి, పెద్ద పెద్ద విండ్ టర్బైన్లు (గాలి నుంచి కరెంట్ తీసే ఫ్యాన్లు) వరకు, కెమెరా లెన్సుల నుండి టీవీ స్క్రీన్ల వరకు... అన్నీ ఈ 17 రకాల రేర్ ఎర్త్ మెటల్స్ మీదే ఆధారపడి ఉన్నాయి. అందుకే, ఏ దేశం దగ్గర ఇవి ఉంటే, ఆ దేశం టెక్నాలజీలో, రక్షణలో అందరికంటే ముందు ఉంటుంది.

మనం ఏదో కొంచెమే వాడతారేమో అనుకుంటాం. కానీ ఒక్కో వస్తువుకు ఎంత వాడతారో తెలిస్తే ఆశ్చర్యం వేస్తుంది.

• ఒక్క ఎలక్ట్రిక్ కారు తయారు చేయడానికి సుమారు 3 నుంచి 5 కిలోల శక్తివంతమైన మాగ్నెట్లు కావాలి.

• ఒక MRI స్కానింగ్ మెషీన్‌కు ఏకంగా 2,000 కిలోల వరకు ఈ రేర్ ఎర్త్ లోహాలు అవసరం.

• ఒక F-35 ఫైటర్ జెట్ (అమెరికా వాడే స్పెషల్ విమానం) తయారీకి 400 కిలోలు వాడతారు.

• సముద్రం లోపల తిరిగే ఒక న్యూక్లియర్ సబ్‌మెరైన్ కోసం ఏకంగా 4 టన్నులు (అంటే 4,000 కిలోలు) ఈ అరుదైన లోహాలు కావాలి.

అంటే, ఇవి లేకపోతే ఏ దేశం కూడా తనను తాను రక్షించుకోలేదు, కొత్త టెక్నాలజీని తయారు చేయలేదు. మొత్తం సిస్టమ్ ఆగిపోతుంది.

ఇక్కడే అసలైన సమస్య ఉంది. ప్రస్తుతం ఈ విలువైన రేర్ ఎర్త్ మెటల్స్ బిజినెస్ మొత్తం ఒక్క చైనా చేతిలోనే ఉంది. ప్రపంచం మొత్తానికి కావాల్సిన వాటిలో 70 శాతం చైనాయే భూమిలో నుంచి తవ్వుతోంది. తవ్వడమే కాదు, అసలైన తెలివి ఇంకో దగ్గర ఉంది. భూమిలోంచి తీసినప్పుడు ఇది మట్టిలా, ముడిగా ఉంటుంది. దాన్ని శుద్ధి చేసి అంటే Process చేసి, వాడటానికి వీలుగా ఫైనల్ మెటల్‌గా మార్చాలి. ఈ శుద్ధి చేసే టెక్నాలజీ ప్రపంచంలో 80 శాతం నుండి 90 శాతం చైనా దగ్గరే ఉంది.

దీనివల్ల ఏమైందంటే, ప్రపంచ దేశాలన్నీ చైనా మీద ఆధారపడాల్సి వస్తోంది. అమెరికా, యూరప్, జపాన్, మన ఇండియా... అందరం మనకు కావాల్సిన ఫోన్లు, కంప్యూటర్లు, డిఫెన్స్ సామాన్ల కోసం చైనా వైపు చూడాలి. చైనా ఈ పవర్‌ను ఒక ఆయుధంలా వాడుతోంది. వాళ్లకు కోపం వస్తే, "మేము మీకు ఈ మెటల్స్ అమ్మడం ఆపేస్తాం" అని బెదిరిస్తున్నారు. కొన్నేళ్ల కిందట వాళ్లు నిజంగానే కొన్ని రోజులు ఎగుమతులు ఆపేశారు. అప్పుడు అమెరికా, యూరప్‌లోని పెద్ద పెద్ద కంపెనీలన్నీ మూతపడే పరిస్థితి వచ్చింది.

ఈ దెబ్బతో మన భారతదేశానికి అసలు విషయం అర్థమైంది. మనం సొంతంగా వీటిని తయారు చేసుకోకపోతే, మన భవిష్యత్తు, మన రక్షణ మొత్తం చైనా దయ మీద ఆధారపడి ఉండాలి. ఇది చాలా ప్రమాదం. అందుకే మన ప్రభుత్వం మేల్కొంది. "ఇకమీదట మన కాళ్ల మీద మనం నిలబడాలి" అని గట్టిగా నిర్ణయించుకుంది.

వెంటనే PLI స్కీమ్  కింద దాదాపు 7,300 కోట్లు కేటాయించారు. 2028 నాటికి కనీసం 6,000 టన్నుల మాగ్నెట్లను మనమే తయారు చేసుకోవాలని టార్గెట్ పెట్టుకున్నారు. ప్రస్తుతం మనం ఏటా 26,000 టన్నుల మాగ్నెట్లను బయటి నుండి కొంటున్నాం. ఈ కొనుగోలు ఇంకా డబుల్ కాబోతోంది. అందుకే మన ప్రయత్నాలు చాలా వేగంగా జరగాలి. ఈ విషయంలో మన హైదరాబాద్‌కు చెందిన ‘మిడ్‌వెస్ట్ అడ్వాన్స్‌డ్ మెటీరియల్స్’ అనే ఒక కంపెనీ, ఇండియాలోనే మొదటిసారిగా ఈ మాగ్నెట్లను తయారు చేయడానికి రెడీ అయింది. ఇది చిన్న మొదలే అయినా, చాలా గొప్ప విషయం.

ఇప్పుడు అసలు గుడ్ న్యూస్ ఏంటంటే... మనం ఈ రేర్ ఎర్త్ మెటల్స్ కోసం చైనా వైపో, అమెరికా వైపో చూడాల్సిన అవసరం లేదు. మన సొంత నేలలోనే, మన తెలుగు రాష్ట్రాల మట్టిలోనే ఈ అద్భుతమైన నిధులు లక్షల టన్నుల్లో ఉన్నాయని GSI , అంటే మన భూమిని పరిశోధించే ప్రభుత్వ సంస్థ, చాలా స్పష్టంగా చెప్పింది.

మన దేశంలో దొరికే వాటిలో 'మోనజైట్' అనే ఇసుక చాలా ముఖ్యం. ఇది సముద్ర తీరంలో దొరుకుతుంది. మన ఆంధ్రప్రదేశ్ తీర ప్రాంతంలోనే (శ్రీకాకుళం నుంచి విశాఖపట్నం, ఆ కింద వరకు) ఏకంగా 37 లక్షల టన్నుల మోనజైట్ ఇసుక ఉందని కనుగొన్నారు. మన తర్వాతే ఒడిశా, తమిళనాడు రాష్ట్రాలు ఉన్నాయి. ఈ ఇసుకలోనే ఆ అరుదైన లోహాలు ఉంటాయి.

అంతేకాదు, ప్రకాశం, నెల్లూరు, కడప, అనంతపురం జిల్లాల్లోని భూముల్లో వేరే రకాల రేర్ ఎర్త్ మెటల్స్ (బాస్టనెసైట్, అలానైట్) దొరికాయి. అన్నింటికంటే ముఖ్యంగా, ఇప్పుడు ఎలక్ట్రిక్ కార్ల బ్యాటరీలకు ప్రాణమైన లిథియం నిక్షేపాలు కూడా అనంతపురం-కర్నూలు ప్రాంతంలో ఉన్నాయని తెలిసింది. ఇవే కాకుండా నెల్లూరు, అనంతపురంలో ఇంకా ఎన్నో విలువైన లోహాలు (టైటానియం, తగరం వంటివి) దొరికాయి.

తెలంగాణలో నిధులు:

ఇక తెలంగాణ విషయానికి వస్తే, మనకు సింగరేణి గుర్తొస్తుంది. సింగరేణి అంటే మనకు బొగ్గు గనులు మాత్రమే తెలుసు. కానీ ఆ బొగ్గు గనుల్లోని మట్టి పొరల్లో, సైంటిస్టులు అస్సలు ఊహించని రెండు చాలా విలువైన రేర్ ఎర్త్ మెటల్స్ (డైస్పోసియం, శ్కాండియం) కనుగొన్నారు. ఇవి టెక్నాలజీలో చాలా కాస్ట్లీ మెటల్స్. వీటితో పాటు రాగి (Copper), గ్రాఫైట్, టంగ్‌స్టన్ వంటివి కూడా తెలంగాణ నేలలో ఉన్నాయి.

మన రెండు తెలుగు రాష్ట్రాల మట్టిలో ఇంత పెద్ద సంపద పెట్టుకుని మనం పేదరికంగా ఉండకూడదు. ఈ నిధులే మన భవిష్యత్తుకు, మన దేశం బలంగా తయారవడానికి అసలైన 'డ్రైవింగ్ ఫోర్స్'.

అయితే, ఇక్కడ మనం ఒక తప్పు చేయకూడదు. భూమిలోంచి ఈ మట్టిని, ఈ రాళ్లను తవ్వి, వాటిని అలాగే 'ముడి సరుకు' లాగా చైనాకో, జపాన్‌కో చౌకగా అమ్మేయకూడదు. అలా అమ్మితే మనకు లాభం రాదు. అది ఎలా ఉంటుందంటే, మనం కష్టపడి పత్తి పండించి, దాన్ని రూపాయికి అమ్మి... వాడు దాంతో బట్టలు కుట్టి మనకే వంద రూపాయలకు అమ్మినట్టు ఉంటుంది.

మనం ఏం చేయాలంటే, ఆ తవ్విన ముడి సరుకును మన దగ్గరే శుద్ధి చేయాలి. మనమే వాటిని ఫైనల్ ప్రొడక్టులుగా, అంటే మాగ్నెట్లుగా, ఇతర వస్తువులుగా మార్చాలి. అప్పుడే మనకు అసలైన లాభం వస్తుంది, మన కుర్రాళ్లకు ఉద్యోగాలు వస్తాయి. ఈ ప్రాసెసింగ్ టెక్నాలజీ కోసం హైదరాబాద్‌లో ఉన్న NFTDC లాంటి పరిశోధన సంస్థలు మనకు చాలా హెల్ప్ చేస్తాయి.

ఈ విషయంలో ఆంధ్రప్రదేశ్, తెలంగాణ రాష్ట్రాలు రెండూ కలిసి పనిచేయాలి. ఆంధ్రప్రదేశ్‌కు పెద్ద సముద్ర తీరం, పోర్టులు ఉన్నాయి. అక్కడ దొరికే సంపదను అక్కడే ప్రాసెస్ చేసి, ఫైనల్ వస్తువులుగా మార్చి, నేరుగా పోర్టుల ద్వారా ప్రపంచ దేశాలకు ఎగుమతి చేయవచ్చు. తెలంగాణకు హైదరాబాద్ లాంటి పెద్ద సిటీ ఉంది. ఇక్కడ టెక్నాలజీ కంపెనీలు, పరిశోధన చేసే సంస్థలు చాలా ఉన్నాయి. ఇక్కడ దొరికే లోహాలను కొత్త కొత్త టెక్నాలజీలలో ఎలా వాడాలో రీసెర్చ్ చేయవచ్చు.

అమెరికాలో కంప్యూటర్ టెక్నాలజీకి 'సిలికాన్ వ్యాలీ' ఎలాగో... మన ఏపీ, తెలంగాణ కలిసి, మన 'దక్కన్ ప్రాంతాన్ని' రేర్ ఎర్త్ మెటల్స్ టెక్నాలజీకి ఒక 'సిలికాన్ వ్యాలీ'గా మార్చాలి. మన దగ్గర ఉన్న ఈ అరుదైన నిధులతో మన దేశ రక్షణను, మన టెక్నాలజీని బలంగా తయారు చేయాల్సిన టైమ్ వచ్చింది.