తులం బంగారం @ 60,000 రూపాయలు… భారీగా పడిపోతున్న బంగారం ధరలు

ఈ మధ్య బంగారం ధరలు చూస్తుంటే చాలా మందిలో ఒకటే టెన్షన్ . ఇప్పటి వరకు భారీగా ఉన్న ధరలు తగ్గుముఖం పట్టాయి. ముఖ్యంగా సోమవారం, మంగళవారం రోజుల్లో అయితే, ఇంటర్నేషనల్ మార్కెట్‌లో బంగారం ధర ఏకంగా 8 నుంచి 9 శాతం పడిపోయింది. దీంతో చాలా మంది భయపడిపోయారు. "అయ్యో, కొన్న ధర కన్నా తగ్గిపోయింది, ఇప్పుడు అమ్మేయాలా? లేక ఇంకా పడిపోతుందా?" అని చాలా కంగారు పడుతున్నారు. అసలు మార్కెట్‌లో ఏం జరిగింది? ఈ భయం అవసరమా? డబ్బులు పెట్టిన వాళ్ల పరిస్థితి ఏంటి? ఈ రోజు హైదరాబాద్, విజయవాడలో బంగారం ధరలు ఎలా ఉన్నాయి అనే అంశాల గురించి పూర్తి వివరంగా తెలుసుకుందాం.

గత నెల, రెండు నెలలుగా చూస్తే, బంగారం, వెండి ధరలు విపరీతంగా పెరిగాయి. దీనికి కారణం, ప్రపంచవ్యాప్తంగా బంగారానికి డిమాండ్ పెరగడమే. ఒక దశలో ఒక ఔన్స్ బంగారం ధర 4,400 డాలర్ల వరకు కూడా వెళ్ళింది. ఈ పెరుగుదల చూసి, ముఖ్యంగా మన ఇండియాలో చాలా మందిలో ఒకరకమైన ఆశ, ఇంకొకరకమైన భయం మొదలయ్యాయి. దాన్నే ఇంగ్లీషులో 'FOMO' అంటే Fear of Missing Out అంటారు. అంటే, "అందరూ కొంటున్నారు, మనం కొనకపోతే ఈ లాభాన్ని మిస్ అయిపోతామేమో" అనే భయం.

ఈ భయంతో, చాలా మంది 'స్పెక్యులేషన్'  మొదలుపెట్టారు. స్పెక్యులేషన్ అంటే, "ఈ రోజు కొనేసి, రేపు ధర పెరగ్గానే అమ్మేసి లాభం సంపాదించేద్దాం" అని అనుకోవడం. ఇది ఒకరకమైన ట్రేడింగ్ లాంటిది. ఈ 'హైప్' వల్ల, అంటే "బంగారం ఇంకా పెరుగుతుంది" అనే ప్రచారం వల్ల, చాలా మంది తమ దగ్గర ఉన్న డబ్బులే కాకుండా, బ్యాంకుల్లో దాచుకున్న ఫిక్స్‌డ్ డిపాజిట్లను కూడా మధ్యలోనే తీసేశారు . మరికొంత మంది అయితే, తెలిసినవాళ్ల దగ్గర అప్పు తెచ్చి మరీ బంగారంలో పెట్టుబడి పెట్టారు. ఇలా లక్షా 20 వేలు, లక్షా 30 వేల లాంటి ఎక్కువ ధరల దగ్గర కొన్నవాళ్లందరికీ, ధర ఒక్కసారిగా 8 నుంచి 9 శాతం పడిపోయేసరికి గుండె ఆగినంత పనయింది.

అయితే, ఇలా కంగారు పడుతున్న సమయంలోనే మార్కెట్ కొంచెం కుదురుకుంది. సోమవారం భారీగా పడిన మార్కెట్, మంగళవారం కొంచెం కోలుకుంది, మళ్ళీ పాజిటివ్  గా మారింది. బంగారం ధర మళ్ళీ 1.63% పెరిగి 4,100 డాలర్ల పైకి వచ్చింది. మన ఇండియన్ మార్కెట్ లో కూడా ఇదే జరిగింది. ధర దాదాపు లక్షా 30 వేల వరకు వెళ్లి, ఒక్కసారిగా లక్షా 22 వేల వరకు పడిపోయింది. కానీ, వెంటనే మళ్ళీ పుంజుకుని, 1.5% పెరిగి లక్షా 23 వేల రూపాయల దగ్గర నిలబడింది. అంటే, పడిన దానిలో దాదాపు 1800 రూపాయలు మళ్ళీ రికవర్ అయ్యింది. ఇది చూసి, నిన్న కంగారు పడిన వాళ్లకి కొంచెం ఊపిరి పీల్చుకున్నట్టు అయ్యింది.

మనం అందరం ఒక ముఖ్యమైన విషయం గుర్తుపెట్టుకోవాలి. బంగారం అనేది స్టాక్ మార్కెట్ లాంటిది కాదు. స్టాక్ మార్కెట్‌లో షేర్లు ఒక్కోసారి వేగంగా పెరుగుతాయి, అలాగే పడిపోతే సున్నా కూడా అయిపోవచ్చు. కానీ బంగారం అలా కాదు. బంగారం అనేది చాలా తక్కువ 'వోలటిలిటీ' ఉండే ఆస్తి. 'వోలటిలిటీ' అంటే, ధరలో వేగంగా వచ్చే మార్పులు, అంటే స్థిరత్వం లేకపోవడం.

వెండి తో పోలిస్తే, బంగారానికి ఈ వోలటిలిటీ తక్కువ. వెండి ధర చాలా ఫాస్ట్ గా పెరుగుతుంది, అలాగే చాలా ఫాస్ట్ గా పడిపోతుంది. కానీ బంగారం చాలా నిలకడగా ఉంటుంది. ఎందుకంటే, బంగారాన్ని ప్రపంచం మొత్తం ఒక 'సేఫ్ అసెట్' లాగా, అంటే ఒక 'రక్షణ కవచం' లాగా చూస్తుంది. మనకు కష్టం వచ్చినప్పుడు ఆదుకుంటుంది అనే నమ్మకం. అందుకే, మన రిజర్వ్ బ్యాంక్ లాంటి ప్రపంచంలోని అన్ని దేశాల సెంట్రల్ బ్యాంకులు కూడా వేల టన్నుల బంగారాన్ని కొని, తమ దగ్గర నిల్వ ఉంచుకుంటాయి. ఎందుకంటే, రేపు ఏదైనా దేశం కరెన్సీ విలువ పడిపోయినా, బంగారం విలువ పడిపోదు.

అంతేకాదు, పెద్ద పెద్ద ఇన్వెస్ట్‌మెంట్ కంపెనీలు కూడా, వాళ్ల మొత్తం డబ్బులో ఒక 10 నుంచి 20 శాతం వరకు బంగారంలోనే పెడతారు. వాళ్లకు తెలుసు, మిగతావన్నీ నష్టపోయినా, బంగారం వాళ్లను ఆదుకుంటుందని. ఇలా పెద్ద పెద్ద సంస్థలు, బ్యాంకులు కొనడం వల్లే, బంగారానికి ఎప్పుడూ డిమాండ్ ఉంటుంది. అందుకే, ధర కొంచెం తగ్గినా, కొనడానికి రెడీగా చాలా మంది ఉంటారు. వాళ్ళు "ఆహా, ధర తగ్గింది కదా, ఇదే మంచి టైమ్" అని కొంటారు. అందుకే బంగారం ధర స్టాక్స్‌లాగా పూర్తిగా కుప్పకూలిపోదు.

బంగారం ధర పెరగడానికి చాలా కారణాలు ఉన్నాయి. అవి ఏవీ ఇప్పుడు మారిపోలేదు. కానీ, ఈమధ్య ఒక్క చిన్న మార్పు వచ్చింది. గల్ఫ్ దేశాల్లో ఇజ్రాయిల్-హమాస్ మధ్య యుద్ధ వాతావరణం వల్ల "అమ్మో, పెద్ద యుద్ధం వస్తుందేమో, ఆయిల్ ధరలు పెరిగిపోతాయేమో" అనే భయం ఉండేది. ఆ భయం వల్ల కూడా బంగారం ధర పెరిగింది. కానీ గత వారం ఆ టెన్షన్ కొంచెం తగ్గింది. ఇది ఒక చిన్న కారణం.

అసలైన, పెద్ద కారణం వేరే ఉంది. అదే, ఈ 'స్పెక్యులేటర్లు'. ఎవరైతే "ఈ రోజు కొని, రెండు రోజుల్లో అమ్మేద్దాం" అని అనుకున్నారో, వాళ్లందరూ ధర కొంచెం తగ్గగానే భయపడిపోయారు. "అయ్యో, ఇంకా పడిపోతే లాభం బదులు నష్టం వస్తుంది" అని, వాళ్ల దగ్గర ఉన్న బంగారాన్ని అంతా ఒక్కసారిగా మార్కెట్లో అమ్మేశారు. దీన్నే 'డంపింగ్' అంటారు. ఉదాహరణకు, మార్కెట్‌లో 100 మంది అమ్మేవాళ్ళు, 100 మంది కొనేవాళ్ళు ఉంటే ధర నిలకడగా ఉంటుంది. కానీ, ఒక్కసారిగా 500 మంది అమ్మడానికి వస్తే, కొనేవాళ్ళు తక్కువైపోతారు కదా? అప్పుడు ధర పడిపోతుంది. ఇప్పుడు జరిగింది అదే. ఈ స్పెక్యులేటర్లు భయపడి అమ్మేయడం వల్లే ధర పడిపోయింది.

ఇలాంటి టైమ్‌లో మనం ఒక పాత సామెత గుర్తుతెచ్చుకోవాలి. "కొనబోతే కొరివి, అమ్మబోతే అడవి". ఇప్పుడు బంగారం షాపుల్లో సరిగ్గా ఇదే జరుగుతోంది. ఎలాగంటే...

రెండు వారాల క్రితం, ధరలు విపరీతంగా పెరుగుతున్నప్పుడు, మనం కొనడానికి షాపుకి వెళ్తే, వాళ్ళు ఏమన్నారు? "సార్, ఫుల్ డిమాండ్ సార్. స్టాక్ లేదు. ఫిజికల్ గోల్డ్ దొరకట్లేదు. మీకు అర్జెంట్ గా కావాలంటే, మార్కెట్ రేటు కన్నా కొంచెం ఎక్కువ ఇవ్వాలి, అప్పుడు తెప్పిస్తాను" అని మన దగ్గర ఎక్కువ డబ్బులు తీసుకున్నారు.

ఇప్పుడు, ధరలు పడ్డాయని మనం భయపడి, మన దగ్గర ఉన్న బంగారాన్ని అమ్మడానికి అదే షాపుకి వెళ్తే, వాళ్ళు ఏమంటారు? "సార్, మార్కెట్ మొత్తం పడిపోయింది. ఎవరూ కొనట్లేదు. మీ దగ్గర కొని నేనేం చేసుకోవాలి? అయినా మీరు అడుగుతున్నారు కాబట్టి, నేనే రిస్క్ తీసుకుని కొంటున్నా. మార్కెట్ రేటు కన్నా కొంచెం తక్కువకే తీసుకుంటాను" అని అంటారు.

ఇప్పుడు అసలు విషయానికి వద్దాం. ఈ ధరల తగ్గుదల చూసి ఎవరు కంగారు పడాలి? ఎవరు పడకూడదు?

ముందుగా, 'స్పెక్యులేషన్' కోసం కొన్నవాళ్లు. అంటే, "ఈ రోజు కొని, వచ్చే వారం అమ్మేసి లాభం చూద్దాం" అని అప్పుసొప్పు చేసి కొన్నవాళ్లు, 10 కిలోలు, 20 కిలోలు వెండి, బంగారం కొన్నవాళ్లు... వీళ్ళు కచ్చితంగా ఇబ్బందుల్లో పడినట్టే. ఇది ఒక జూదం లాంటిది. ఇందులో రిస్క్ చాలా ఎక్కువ. ఆ నష్టాన్ని తట్టుకునే శక్తి ఉంటే తప్ప, ఇలాంటివి చేయకూడదు.

రెండో రకం, 'లాంగ్ టర్మ్ ఇన్వెస్టర్స్' . అంటే, ఐదు, పది, ఇరవై సంవత్సరాల తర్వాత అవసరం కోసం కొన్నవాళ్లు. "మా పాప పెళ్లి కోసం, బాబు చదువు కోసం" అని కొంచెం కొంచెంగా దాచుకున్నవాళ్లు. ఇలాంటి వాళ్ళు అస్సలు, ఒక్క శాతం కూడా భయపడాల్సిన అవసరం లేదు. దయచేసి టీవీలో వచ్చే వార్తలు చూసి కంగారు పడకండి. బంగారం ధర లక్షకు, లక్షా పదివేలకు పడిపోతుందని ఎవరైనా చెప్తే అస్సలు నమ్మకండి. చరిత్రలో బంగారం ఎప్పుడూ అలా కుప్పకూలిపోలేదు.

మీరు కొన్నది 'లాంగ్ టర్మ్' కోసం. అంటే మీ టార్గెట్ 10, 15 ఏళ్ల తర్వాత. అప్పటికి, ఈ రోజు పడిన 8 నుంచి 9 శాతం అనేది చాలా చిన్నదిగా కనిపిస్తుంది. మీ డబ్బు సేఫ్ గా ఉంటుంది. కాబట్టి, లాంగ్ టర్మ్ వాళ్ళు ప్రశాంతంగా ఉండండి.

బంగారాన్ని ఎప్పుడూ 'FOMO' తో కొనకూడదు. అంటే, "అందరూ కొంటున్నారు, నేనే మిస్ అవుతున్నాను" అనే ఆత్రుతతో కొనకూడదు. కొనేముందు మిమ్మల్ని మీరు ఒక ప్రశ్న వేసుకోండి. "నేను ఈ బంగారం ఎందుకు కొంటున్నాను? నా కూతురి పెళ్లి కోసమా? లేక పక్కింటివాళ్లు కొన్నారని కొంటున్నానా? లాంగ్ టర్మ్ కోసమా? లేక షార్ట్ టర్మ్ లాభం కోసమా?" అని.

షార్ట్ టర్మ్ లాభం కోసం కొంటే, ఇప్పుడు వచ్చినట్లే కష్టాలు వస్తాయి. అదే లాంగ్ టర్మ్ అవసరం కోసం కొంటే, మీకు ఎటువంటి టెన్షన్ ఉండదు. బంగారం అనేది 'త్వరగా డబ్బు సంపాదించే స్కీమ్' కాదు. అది మన 'డబ్బును కాపాడే ఒక రక్షణ' . కాబట్టి, కంగారు పడకండి, లాంగ్ టర్మ్ కోసం ఇన్వెస్ట్ చేసుకోండి, ధైర్యంగా ఉండండి. ఇక చివరిగా హైదరాబాద్ లో ఈ రోజు 24 క్యారెట్ల తులం బంగారం ధర లక్షా 25 వేల 560 రూపాయలుగా ఉంది. అలాగే 22 క్యారెట్ల బంగారం ధర  లక్షా 15 వేల 150 రూపాయలుగా ఉంది. అటు విజయవాడలో కూడా ఇవే ధరలు కొనసాగుతున్నాయి. అయితే రష్యా - ఉక్రెయిన్ యుద్ధం, ఇజ్రాయిల్ - హామాస్ యుద్ధం ముగిసినా, అలాగే అమెరికా ట్రేడ్ వార్ ను ఆపేసినా… బంగారం ధరలు ఇంకా భారీగా పడిపోయే అవకాశం ఉంది. తులం బంగారం 60 వేలకు వచ్చే అవకాశం ఉంది.